HISTORIA LIBRI ACTUUM APOSTOLORUM

CAPUT XXVII: De responsione eorum

#Act. V

Tunc abiit magistratus cum ministris, id est princeps sacerdotum. Et est magistratus singularis numeri, et eodem modo in praecedenti secundum Graecum. Et adduxit eos sine vi, non audens eis violentiam facere, propter populum qui favebat eis. Et statuerunt eos in consilio, et ait illis princeps sacerdotum: Praecipiendo praecepimus vobis auctoritate scilicet pontificali, ne doceretis amplius in nomine isto, scilicet in nomine Jesu, et ecce replestis Hierusalem doctrina vestra. Nunquid vultis inducere super nos sanguinem hominis hujus? id est sanguinis vindictam. Quasi dicat: Nunquid arguistis nos quasi reos sanguinis innocentis, praedicando eum innocentem, quem condemnavimus? Et responderunt unanimiter omnes apostoli ex fervore et zelo, non patientes unum pro omnibus loqui. Obedire oportet Deo magis quam hominibus. Deus patrum nostrorum suscitavit Jesum, quem vos interemistis suspendentes in ligno, et exaltavit illum ad dexteram suam, et nos testes sumus horum verborum, et Spiritus sanctus, quem dedit, non solum nobis, sed omnibus obedientibus sibi. In quo ad poenitentiam eos provocant. Ac si dicant: Etiam vobis si velitis obedire: Haec audientes dissecabantur cordibus suis.